林碧碧

因為工作關係而認識，初頭感覺真係麻麻哋，不過，做嘢之嘛，冇乜關係啦∼∼

點知呢，最近同佢竟然發生咗關係！

我不嬲都唔會喺做嘢嘅地方識朋友。做嘢嘛，有利益衝突就有無間道，隨時係豬八戒照鏡 — 兩面不是人。為免落人口實，做完嘢，拍拍籮柚就走人。做朋友嘛，得！兩個都遠離是非地咁就冇有怕喇，冇壓力冇牽掛冇無間道，到時就真係醉酒佬數街燈 — 不知幾盞！

咁又話說呢個林碧碧跳咗槽，又好鬼機緣巧合咁見番仲吹咗一大陣凍水。而咦∼∼ 原來佢個人又幾好個噃∼∼ 真係我攞個心出嚟佢唔會當狗肺，又會挖番佢個心出嚟好似同你交換禮物咁，好盞鬼㗎！

仲有，我鍾意寫嘢，原來佢又有自己嘅地盤爬格仔。從佢寫嘅內容、節奏、語氣，我更加相信碧碧係一個性情中人。所以我都忍唔住同佢講咗聲“I love you!”

就係咁，我哋就發生咗關係喇∼~

係發生咗一段新嘅關係，由工作夥伴變成朋友關係。

我深信，我哋兩個仲可以做到交心嘅知己朋友。能夠交到一個朋友已經好好 (詳見《打膠道》一文)，若果交到一個能夠互相了解，支持對方嘅朋友就更加係一種福氣。所以呢，我會好努力咁做好自己嘅腳色，令到呢個新嘅關係一直廷續落去！

林碧碧，呢篇嘢就當係我送俾妳嘅聖誕禮物啦！Merry Christmas!