兒童前樂園，成人後花園

今日係老爸農曆正日生日，上個禮拜日經已連同阿媽、大佬大嫂加埋佢最𡃶嗰粒孫，一齊食飯慶祝。

但係，我鄉下個大伯父尋日就過咗身。爸爸固然難過，我亦都無晒心機，覺得有一種虧欠。

細個嗰陣時，時不時都會回鄉探親大玩特玩，同村嗰啲小朋友都係同一個姓。大伯父同伯娘都好𡃶我，成日抱住我來糟質。大伯父雖然比較市儈，又雖然鄉下無乜好餸，但係佢點都會留隻雞髀過我𡁻。日頭又會帶我落田捉隻水牛落河沖涼，隻牛擺完堆又會教我用煙花炸開佢。總之一切都係城市無得玩嘅都有，仲玩到唔願落嚟，直頭想做個大陸牛屎飛就算。

不過，人越大，越係想出去出面闖，反而慢慢咁忘記咗望番轉頭。

喺大城市生活，人情世顧真係顧得呢個就顧唔到呀邊個；無永遠嘅朋友亦無永遠嘅敵人。咁即係無間道日日無間斷咁上映，朋友／敵人呢兩個身份可以喺同一個人身上好似蛇咁不斷脫皮更新。驚？咁又唔使！

鄉下依然係個樂土，正所謂情是故鄉純，同村打埋算盤都係自己友嘛。我哋向前走呀走，佢哋唔會跟亦未必跟得上；但係，就算佢哋望住我哋個背影越來越遠甚至睇唔到，佢哋依然唔會走開，耐心咁盼望遊子歸來嗰一日。就算我哋在外打拼到滿身傷痕，或最終落得一無所有，咁又點？！喺佢哋眼中，只係會見到一隻倦鳥終於知還，喺我哋眼中，只係會見到一張又一張親情滿溢嘅笑臉。輕輕一抱，萬語千言盡在無聲色中！

遊子從未離開，兒童樂園亦從未關閉。

可惜，大伯父等我唔到就先行一步... 大伯父放心，我一定到㗎，等我！



嫌鄉下遠，咁就多啲番屋企啦，阿爹阿娘一樣晚晚等我哋門㗎！記住呢句說話：

「衰仔／衰女，多啲番嚟飲湯啦！」

三歲國慶

姪女醒目，三年前喺佢阿娘肚入面經已老謀深算要擇日出世。到到國慶當日煙花都未燒就搶閘應市，以不足月之齡準備攻陷各老老嫩嫩嘅男人心！

三年後嘅今日，姪女都算係略有少成，家中各大小男人無不拜倒佢皎潔嘅笑容底下。

今日同姪女慶祝生日，我買咗個同佢一樣咁高嘅熊啤啤，諗住呀姪女一見到就梗係會開心到嘵飛啦，點知佢剩係好狡猾咁笑就硬係冇出聲！結果我呢個秀外慧中嘅姪女就係咁不費一言一語，剩係眼仔碌碌咁，我呢個啊叔就俾佢笑裡藏刀兼滿肚密圈嘅笑容溶咗，乖乖咁雙手奉上隻啤啤熊，我就俾呢個姪女吹到啤∼∼∼一聲！

好彩呀姪女都好醒目咁嘴對嘴𡃶咗我一啖，總算攞番個尾彩！

假以時日，當姪女修成正果，天下間所有男人都可以掘定個墳準備領死喇！