星期三, 2月 22, 2006

農情化不開

本來呢篇嘢係2005年12月17號寫咗個開頭,到而家至寫完,真真羞家!

噚晚2005年12月17號星期六,拎開個電視睇新聞。嘩!我以為日本嗰個九泉鬼太郎拜完八格爺老鬼就俾邪靈上身食髓知味想再番尋味、揮軍移師香港重演當年狗狗狗偷襲珍珠港2005年軍國主義靜雞雞復辟試驗版﹣夜襲維多利亞港

就畫面上所見,紅磡海底隧道自1972年通車之後第一次無車行!我諗當年排頭位捐隧道嘅主禮嘉賓開心果,今日見到都會勸吓個女唔好回流香港做白痴公主,免得有起事上嚟俾人捉去勞軍喇。

碌大四隻眼睇真啲,原來係大韓民國又一股強列韓風登陸香港,破壞力勁過當年發十級脾氣嘅溫黛姐姐。不過哩一股充滿耕田牛屎味嘅韓風一樣咁唔好老脾,但係又竟然有香港人唔嫌屎臭,上至政棍下至無知市井屠狗輩都爭住湧埋去煽風點火。

所以呢,啲人話香港人人情紙咁薄、對人漠不關心、政治性冷感,等等等等,都係錯嘅。

中國人嘅說話真係充滿智慧滿有玄機。有句說話叫:「無寶不落」港府話都有句咁上下意思:「乜風吹你嚟呀?」即後話空穴來風事出有因,一定係有蜜糖至會有蜜蜂飛過來嘅。今次香港樽蜜糖個牌子叫做WTO,班韓國農民話WTO係奸商,攪到無飯開好慘,所以就一窩蜂咁飛過來示威話要抗爭到底。

韓國人示威係舉世聞名嘅,而且韓國人個個都要服兵役,實力自然有咁上下。一年當中都總會有幾次睇電視新聞,見到南韓乜乜公會唔妥啲唔知乜鬼嘢,跟住就萬人空巷咁上街遊行、絕食、火燒某某人嘅人像,又或大鑼大鼓起勢咁跳風雲火舞,簡直係波瀾壯闊群情洶湧殺氣騰騰。

咁韓國嘅防暴警察嗰種凶狠更加係遇神殺神遇佛殺佛,手起刀落殺到你一頸都係血。唔信?!口講無憑,自己用眼睇吓:

http://www.strike.or.kr/

人家韓國嘅防暴警察出手幾咁瀟灑,一棍舉起兜頭就咁吽落去,個盾牌就直頭打橫對準喉嚨車埋去。幾乎攪唔清邊一班先至係暴民。

比起人哋,我哋班香港警察出手就低莊喇。來來去去都係得幾樽胡椒粉、幾支水槍、幾粒沙砲,仲以為係細路仔玩泥沙﹣小兒科嘛。之不過呢,都仲竟然有香港人話香港警方濫用暴力喎。跟手仲有件神棍以為自己耶和華上身,三審都唔使就判定香港警方係香港嘅恥辱喎。末世囉、末世囉,魑魅魍魎山精妖怪都可以日光日白出嚟妖言惑眾,香港唔係一塊福地仲可以係乜?!

話香港係文明地,其實都幾似是而非。小農特色始終揮之不去。農民就係睇天做人、聽天由命等運到等人幫手。智者就係自強不息,堅信命運在我手唔會俾人揸頸就命。

由一個小小漁港大家守望相助,到經濟起飛以為自己發咗達就增人富貴厭人貧各家自掃門前雪。又會好似啲上流人咁做啲下流事﹣懶高尚咁動不動就將啲愛心當利是咁周圍派,完全唔理係咪派得其所。為咩?自我感覺良好囉!眾生平等,個個都有自己嘅方法去搵自己嘅生存空間,亂咁叉隻手埋去干涉人哋簡直係多舊魚!人哋要幫手自然會開聲,人哋都有尊嚴,立亂去幫人其實就係自大自以為高尚嘅白痴。將一己自以為嘅尊榮強加於人哋頭上,一係就好似啲政客神棍咁為咗自我感覺良好,一係就懶係愛心爆棚不分青紅皂白眼有盲點嘅死白痴!話香港係國際都會文化地?我諗都要再嚟多次文化大革命、強制性思想大清洗至得喇。

韓國班農民話啲大國攪到佢哋三餐不繼,點解又可以隨時一千幾百人四圍飛去世界各地開嘉年華會呢?啲錢又係邊度嚟嘅呢?將啲錢儲起會唔會好可觀呢?

其實啲錢咪又係啲政黨俾出嚟玩嘢,啲韓農亦不外乎係政治上嘅籌碼。一言以蔽之,精人出口笨實咪出手囉。班韓農嚟到香港呢個小農社會正正如魚得水,難得又遇到一班愛心爆棚嘅香港人,再加一班口蜜腹劍嘅香港政棍、神棍,仲有一堆諸多制肘嘅香港警察,班韓農簡直係玩到樂而忘返!

先講我哋香港吖,有個屋村師奶唔小心跌咗屋企鎖匙都竟然俾人話佢掉垃圾要罰1500蚊。班韓農一個唔該拆咗個3米高鐵欄順手掉落海,最後警方都可以話證據不足而乜人都無拉到。雖然話因為社會壓力唔方便出手免招麻煩,但係我呢個俾人罰過掉垃圾嘅人就梗係唔服啦,直頭想走去灣仔警察總部門口剥花生咬瓜子。

班韓農話啲大國對佢哋不仁,咁我哋香港人冇對你班友不義啩!俾個位你哋友仔示威又唔安份守己聽聽話話,係都要四圍咁走至高興,見到馬路有車一樣照衝。成個灣仔到成個香港島就俾你班農民當係自己個農場咁玩哂,唔好彩車到你班友仔又有藉口俾班政棍話香港政府無好好實施交通管制。班韓農打個示威旗號就乜都得,視香港法治如無物。破壞公物、擾亂公眾秩序、沖擊執法人員想點玩就點玩,仲好過去迪士尼!韓農話大國欺壓佢哋即係話人哋大國有強權無公理,但係呢班農民以暴易暴想點就點又同班大袋有乜分別?!一樣都係邊個手西瓜硬就邊個揸旗,手段一樣咁污糟邋遢,扮乜嘢可憐搏同情。有咁多精力四圍飛去攪 Party, 耕多兩塊田諗吓點樣改善吓啲農作物嘅質素咪仲實際!唔通我哋香港人又組個一千幾百人嘅首爾七日豪華示威團過去覆桌喇喎?!咪癲啦!

好喇,到香港差佬扣留幾件韓農嘅蛋散問吓話,又話再唔放人就班多千零件蛋散到香港攪局話要同香港差佬過唔去要對著幹。你攪事我拉人,有乜唔妥?!差佬都要做啲門面功夫公關嘢㗎嘛,唔做又會俾人插話縱容滋事分子。請班韓農飲吓咖啡傾吓計之嘛,咁就有條神棍閃出嚟話香港警方係香港嘅恥辱!神棍越嚟越入世,但係去天堂條路離佢就越嚟越遠喇。恭喜恭喜!

最可恨最可恨就係一個千古不變嘅定律﹣自家人打自家人打得特別狠!

韓農嚟攪事,大開中門不特止,仲要「歡迎!歡迎!熱烈歡迎!」再加掌聲鼓勵。差佬做嘢盡忠職守就俾人打都未夠,仲要俾自家人冷嘲熱諷喊打喊殺趕狗入窮巷做過街老鼠。本是同根生,相煎何太急呢?!

香港人,唔好一腳係泥又一腳牛屎啦,著對皮鞋做個文明人啦!