打膠道

認識新朋友，我哋會嘗試搵個話題亂嗡一餐投其所好，此之謂套交情、打交道。目的，係希望對方當自己係自己友。

交者，溝通，有問有答有說有笑你敬我一尺我敬你一丈山水有相逢。有來有往咁解。

膠者，絕緣體，唔過電唔啾唔啋你死你事唔關我事閘住反彈冇回頭。不相往還嘅意思。

最近，雖然都係唔多勇敢，但係中國人唔可以唔做，所以走去學普通話。北上發展未輪到我，但穿窿褲裡面隻雀仔總有日會穿龍附鳳游龍戲鳳，學多樣嘢梗冇壞。以為煲冬瓜易過借火，煲吓煲吓先至知火候好難控制。正所謂「一樣米養百樣人」，一種普通話有十九幾萬種方言。北京嘅張三同南京嘅李四，環迴立體聲向左講向右講，真係小明小明小小明囉。出外靠朋友，溝通唔到就麻煩喇，勉強講得通都唔會當你係自己友，歪路未必會點你行，但明路就必定冇你份。

唔好話喺大陸咁遙遠，人情紙咁厚嘅香港，風行一時嘅《金枝慾孽》依然廿四小時逼你上演真人騷，指定台詞係小布牛仔總統嘅金句“If you are not one of us, you are one of them!”。所以，上有高層次「董班子」、「曾班子」；下有草根童黨組成嘅「小童群抽會」、「攻擊小年團」。中國雖已解放，但租界依舊長存不滅，組黨分派劃地為界。黑頭髮黃皮膚炎黃子孫統稱華人，再冇漢奸呢回事，但近年通勝新增「二五」為大凶之數。埋堆攝位撈油水梗預埋自己友，肥水不流別人田嘛。庸碌無能兼由黑鑊揹到大令鑊，冇有怕，大佬梗睇住條𡃁嘅。識得擦鞋就梗有你世界，就算再冇利用價值都會俾個「忽然健康差」嘅御賜下台階。若然唔係自己友，話之你係同根生都唔准你回歸母親懷抱。

所以呢，識得打交道係幾咁緊要。打交道前要做好功課，擦錯鞋冇人可憐。最重要係良禽擇木而棲唔好濫交。牆頭草兩邊擺亦係大忌，扣帽子就唔會，幫你戴個膠笠從此絕緣冇計傾。

若然明知高攀唔起都仲要打腫塊面充闊佬，打交道變打膠道，人哋再醒多兩巴，咁你就真係戇膠膠喇！

我病你都病

病到想死，好無奈咁睇醫生。發燒，仲燒埋銀紙，但醫生有句說話就真係值錢喇！

我最怕就係小病，大病反而唔怕。

大病如「發雞盲」，咁你知道你將會盲，有定數有心理準備就知下一步點做，冇有怕！

小病其實係一個錯覺，雖云：「病向淺中醫」，但你同我好多時都係得過且過、側側膊唔多覺以為過得骨。結果，感冒可以入腸入骨對號入坐，到時真係上天無門落地無路兼藥石無靈！

所以，感冒發燒喉嚨痛加上思覺失調疑神疑鬼，三魂唔見七魄咁去睇醫生。見到醫生，口中諗諗有詞問長問短驚驚青青，醫生淡淡定定就咁丟低一句：「我係醫生你唔係，睇病係我嘅專業，你唔信我仲可以信邊個？！」

係喎！魂魄即時歸位，唔駛番叮，即走！準時食藥，信者必可得救！

醫生呢句話亦都係我工作上鐵價不二嘅座右銘，所以醫生一講我即刻收聲。日常工作，自以為尊貴嘅客戶小人，最喜歡說三道四指手畫腳自以為是。我都係專業嘅，唔會掉低句：「只要信，不要問！」就算，亦唔會好似政府咁：「不會就個別事件而作出評論。」或以諮詢公眾為理由嚟拖延時間不了了之咁乞兒。搵得我做就要信賴我嘅專業，有分歧係好正常。攤出嚟講唔啱講到啱，唔好大石壓死蟹一句：「客戶永遠是對的！」就以為勁到可以擺平我咁幼稚，以德服人總好過俾人背後鬧臭四。自大有藥醫，互相信任係靈丹妙藥，有需要時服用，包保藥到病除。

我有病，醫生要我打針就打針，食藥就食藥，互相信任則能醫百病。客戶搵我，我會以我最專業知識嚟幫你解決問題，信任我亦同時顯示你胸襟有幾廣闊，大家都開心！

客戶有病，我就係醫生，醫生嘅責任係有得醫就梗係醫，冇得醫都會試試死馬當活馬醫。若果真係壽終正寢，冇資格擔幡買水都會風光大葬祝你入土為安！

「你唔信我仲可以信邊個？！」嘩！幾咁豪氣干雲！不過我唔係乜仁膽俠醫，唔好以為我會贈醫施藥咁偉大，唔俾錢錢又點能夠開藥過你食！醫生都會肚餓嘛！